Экономикалык кылмыштуулукка каршы күрөшүү кызматын жоюу сунушталды

Депутат Алтынбек Сулайманов өкмөткө караштуу Экономикалык кылмыштуулукка каршы күрөшүү боюнча мамлекеттик кызматын жоюуну сунуштады. Депутаттын айтымында, аталган кызматтын жасаган иши жыйынтыксыз болууда.

"Бул кызматты жоюп салып, милдеттерин Салык кызматына өткөрүп берип салалы. Эмне иш жасаганынын пайдасы жок болуп жатса, ашыкча чыгымдын эмне кереги бар? Булар экономикалык кылмыштарга каршы күрөшүү жүргүзүшкөн жок. Болбосо азыр сунуштап жаткан мыйзам долбоорун жакшылап иштеп чыгышсын, кийин дагы карап көрөбүз", - деди Сулайманов.

Жыйында Экономикалык кылмыштуулукка каршы күрөшүү боюнча мамлекеттик кызматынын милдеттери тууралуу мыйзам долбоору каралып жаткан. Талкуунун соңунда депутаттар мыйзам долбоорун кайра иштеп чыгуу үчүн артка кайтарышты.

Аталган кызматтын жетекчисинин орун басары Эмил Жамгырчиев мыйзам долбоору боюнча депутаттардын суроолоруна жооп берип жатып анда иштегендердин орточо айлыгы 15 миң сомдон 20 миң сомго чейин экендигин айтты. "Орточо айлык 15 миң сомдон 20 миң сомго чейин. Жетекчилердин айлыгы бир аз көп. Кызматкерлерге дем болуш үчүн экономикалык кылмыштуулуктан түшкөн каражаттын 30 пайызын өзүбүзгө алып калууну сунуштап жатабыз", - деп айтты.

Депутат Таабалды Тиллаев: "Уурулар уурдап кеткен акчаны мамлекетке кайтаруунун ордуна кандайча 30 пайызын алып калалы деп жатасыздар. Ал мамлекеттин акчасы, бюджетке түшүүсү керек", - деп ачууланды.