Сотто Зилалиевдин жардамчысы ал курчоодо турган кызга "чоң кыз, сизге форма жакшы жарашат экен" деп айтканын билдирди

Бүгүн, 25-майда Бишкек шаарынын Биринчи Май райондук сотунда Мамлекеттик мүлк фондунун мурдагы төрагасы Дүйшөнбек Зилалиевдин иши каралып жатат. Анын жүрүшүндө 2017-жылы 24-ноябрь күнү унаасы менен Дүйшөнбек Зилалиевди жумушка алып барган жардамчысы Манас Балтабаев көрсөтмө берди.

"Ошол учурда Дүйшөнбек Текшербековичтин жардамчысы элем. Ал күнү Дүйшөнбек Текшербековичти унаам менен барып жумушка алып кеттим. Жолдо бара жатып жол чыракка токтодук. Ал жерде милициянын формасын кийген кыз курчоодо туруптур. Дүйшөнбек Текшербекович ал кыздын көңүлүн көтөргүсү келдиби "чоң кыз, форма сизге жарашат экен" деди. Кийин унаа ордунан жылган учурда "чоң кыз, формаңызды оңдоп алыңыз" деди. Мен Дүйшөнбек Текшербековичке айттым, сизди туура эмес түшүнүп калды окшойт, бизге башкача тиктеп калды дедим", - дейт Балтабаев.

Айта кетсек, буга чейин "Дело №" гезити президент Сооронбай Жээнбеков ант берип жаткан күнү "өкмөттүк жолго жардыруучу зат коюлган" деген жалган маалымат тууралуу жазган. Басылманын маалыматында, ИИМ Академиясынын курсантына, кара Лексус айдап жүргөн белгисиз адам өкмөттүк жолго жардыруучу зат коюлганын айткан. Ал жерге Бишкек ШИИББинин ыкчам-тергөө тобу барып, шектүү эч нерсе табышкан эмес. Кийинчерээк бул маалыматты айткан Зилалиев экени белгилүү болуп, бул факт боюнча кылмыш иши козголгон.

Дүйшөнбек Зилалиев болсо SUPER.KG порталына жогорудагы маалымат абсурд экенин, болгону курсант кыздын формасына сын айтканын билдирген.