ЖЫЛНААМА, 27-МАЙ: Баңгизат колдонуп, анын айынан түрмөгө отуруп чыккан бокс боюнча дүйнө чемпиону Жонни Тапиа быйыл 51 жашка чыкмак

Тапиа 8 жашында апасынан ажырайт. Ал эми атасына карьерасындагы эң таанымал учурунда биринчи жолу жолугат. Аны чоң атасы менен чоң энеси чоңойткон. Жаш спортчу 1980-жылдары өз алдынча бокс менен машыга баштаган. 1983-1985-жылдары 2 жолу Америкадагы мелдештерде жеңишке жетишкен. 1988-жылы гана профессионалдык бокс менен алектенип, ошол эле жылы дебюттук беттешин өткөрөт.

1990-жылдары Тапиа баңгизат колдоно баштайт. Натыйжада 3 жылга мелдештерден четтетилип, дарыланууга жиберилет. Боксчу 4 жылдан кийин гана кайрадан рингге кайткан. Ошентип 1995-жылы бокстун WBO Хосе Рафаэля Сосу версиясы боюнча дүйнө чеимпиондугунда ийгиликке жетип, биринчи чемпиондук титулуна ээ болот. Мындан башка да бир нече жолу түрдүү версияларда чемпондукка жетишет.

Спортчу карьерада канчалык бийиктеген сайын баңгизатка да ошончолук көз каранды боло берген. Натыйжада кайра-кайра дарылануу үчүн ооруканага жатып турган. 2007-жылы Тапиа америкалык мушкер Эваристо Примеро менен беттешер алдында бокстан кетерин жарыялаган. Беттештен кийин ал мейманкананын бөлмөсүнөн эсин жоготкон абалда табылат. Анын жанында кокаин да болгон. Ошентип ал 2009-жылы баңгизатты сактаганга айыпталып, камакка алынган. Түрмөдөн чыккан соң ал кайрадан бокска кайтат. Өзү ошол күндөрүн "менин баңгизаттан көз каранды болбой калышыма жубайым Терезанын салымы чоң" деп эскерген. Тапиа акыркы мелдешин 2011-жылы колумбиялык мушкер Маурисио Пастраныга каршы өткөрүп, кийин биротоло бокстан кеткен.

Тапиа 2012-жылы 27-майда АКШнын Альбукерке шаарындагы өз үйүнөн жансыз абалда табылган. Алгач анын өлүмүнүн себеби аныкталган эмес. Кийинчерээк жубайы Тереза мушкер жүрөк оорусунан көз жумганын билдирген.

27-майга карата жылнаама.