Түштүк Корея президенти Түндүк Корея лидери менен эмне тууралуу сүйлөшкөнүн айтты

Түштүк Корея президенти Мун Жэ Ин Түндүк Корея лидери Ким Чен Ын менен болгон жолугушуусу тууралуу айтып берди. Ал бүгүн, 27-майда Сеул шаарында эки тараптуу жолугушуунун жыйынтыктары боюнча атайын маалымат жыйын өткөргөн. Бул тууралуу чет элдик басылмалар жазышууда.

Маалыматка караганда, эки Корея лидерлери 26-майдагы жолугушуусунда негизги 2 маселе боюнча сүйлөшкөн. "Биринчи маселе Корей жарым аралын куралсыздандыруу болсо, экинчи маселе Ким Чен Ын менен АКШнын президенти Дональд Трамптын 12-июнга белгиленген жолугушуусу тууралуу сүйлөшүлдү", - деп жазышат басылмалар. Ошондой эле 27-апрелдеги алгачкы жолугушууда кабыл алынган декларацияны ишке ашырууну тездетүү маселеси да каралган.

"Ким Чен Ын Корей жарым аралын куралсыздандырууга кызыкдар. Ошондой эле ал 12-июнда Дональд Трамп менен жолугууну пландоодо жана АКШнын суук мамилесине тынчсызданууда. Трамп менен Ындын жолугушуусу ийгиликтүү аяктаса, Түштүк Кореянын катышуусунда кайрадан 3 тараптуу саммит өтүшү мүмкүн. Анда Корея согушунун аяктагандыгы тууралуу документке кол коюлат", - деп билдирген Мун Жэ Ин.