Чет өлкөдө каза болгон Кыргыз жарандарынын сөөгүн алып келүү үчүн 1-июндан тарта 50 миң сом бериле баштайт

Чет өлкөдө каза болгон Кыргыз жарандарынын сөөгүн алып келүү үчүн жөлөк пүлдар 1-июндан тарта бериле баштайт. Бул тууралуу бүгүн, 28-майда Мамлекеттик миграция кызматынын төрагасынын орун басары Самат Токтоболотов айтты.

Анын айтымында, маркумдардын жакындары жөлөк пулду 3 ай аралыгында ала алышат.

"Чет жакта жүрүп каза болгондордун сөөгүн алып келүүгө бир топ жеңилдиктер түзүлдү. Буга чейин маркумдардын денесин алып келүү үчүн 1 айга жакын убакыт кетсе, азыр 3 күндө алып келүүгө болот. Ошондой эле мурда ондогон документтерди чогултуш керек болсо, учурда 3 эле документ керек. Жаңы мыйзам 1-июндан тарта күчүнө кирет. Каза болгондордун 98 пайызы Орусиядан алынып келгенине байланыштуу бул жагдай эске алынып, жөлөк пулдун көлөмү 50 миң сом деп бекитилген. Бул каражат чет жакта окууда, эс алууда же болбосо иштеп жүрүп каза болгондордун жакындарына берилет. Буга чейин комиссиянын чечимине жараша 15-30 миң сом берилчү", - деди Токтоболотов.