КТРКнын башчысынын орун басарлыгына Шайырбек Абдырахман көрсөтүлдү (өмүр баяны)

Коомдук телерадиоберүү корпорациясынын (КТРК) башкы директорунун орун басарлыгына Шайырбек Абдырахман көрсөтүлдү. Бул маалыматты SUPER.KG порталына ал өзү тастыктады.

Ал КТРКнын башкы директорунун радио уктуруулар боюнча орун басары болуп иш алып бармакчы.

Абдырахмандын айтымында, учурда ал директордун орун басарынын милдетин аткаруучу болуп иштеп жатат. "Эми КТРКнын байкоочу кеңеши мени расмий түрдө кызматка бекитип бериши керек. Бул боюнча жыйын качан өтөрүн так билбейм. Эгер кызматка толук киришип калсам, алгач жалпы жамаат менен жакындан таанышып, коомчулуктун талабын бирге орундатууга аракет жасайм", - деди ал.

Шайырбек Адырахман 1976-жылы 27-сентябрда Аксы районунун Кара-Жыгач айылында туулган.

1994-2000-жылдар аралыгында Кыргыз мамлекеттик университетинин кыргыз филологиясы факультетинде билим алган.

2001-2008-жылдары КТРКда эмгектенген.

2009-жылдан тарта ЭлТР каналында эмгек жолун уланткан.

2010-2013-жылдары ЭлТР коомдук телерадиокомпаниясынын башкы директору болгон.

Эске салсак, башкы директордун орун басары болуп буга чейин Кайрат Иманалиев иштеп келген.