Сапар Исаков менен Райымбек Матраимовдун иши боюнча соттун чечими 6-июнда угузулат

Мурдагы өкмөт башчы Сапар Исаков менен Мамлекеттик бажы кызматынын төрагасынын мурдагы орун басары Райымбек Матраимовдун соттук ишиндеги териштирүү иши аяктады. Бул тууралуу бүгүн, 28-майда соттук отурумдун уланышында белгилүү болду.

Сапар Исаков менен Райымбек Матраимовдун иши боюнча соттун чечими 6-июнь күнү саат 10:30да тааныштырыла тургандыгы маалымдалды.

Буга чейин сот отуруму 10 жана 16-майда болуп, анда Бажы кызматынын төрагасынын мурдагы орун басарынын жактоочусу соттон Матраимовду кайра өз кызмат ордуна дайындалышын өтүнгөн.

Эске салсак, Исаков Матраимовду 2017-жылдын 23-ноябрында "иши саясий жетекчиликтин чечимдерине жана жүргүзгөн саясатына каршы келет" деген жүйө менен Бажы кызматынын төрагасынын орун басарлыгынан алган. 26-апрелде Матраимов "мени негизсиз жумуштан алды" деп Исаковду сотко берген.