"Түндүк" темир жол бажысынын мурдагы башчысы Нурбек Айбашев мамлекетке 166 миллион сом зыян келтирген деп шектелүүдө (үйүн тинтүү учурундагы видео)

25-майда “Түндүк” темир жол бажы кызматынын мурдагы башчысы Нурбек Айбашевдин үйүнө тинтүү жүргүзүлдү. Бул тууралуу Экономикалык кылмыштарга каршы күрөшүү мамлекеттик кызматынан SUPER.KG порталына билдиришти.

Маалыматка ылайык, анын үйүн тинтүү учурунда баалуу буюмдар, алтын кол сааттар жана бир катар келишим документтери табылган.

“Айбашев “Түндүк” темир жол бажы кызматын жетектеп турганда "А" ЖЧКсы менен мыйзамсыз сүйлөшүүлөрдү жүргүзүп, Кытайдан келген товарларды жасалма документтин негизинде каттоого алууга мүмкүнчүлүк түзүп берген деп шектелүүдө.

Мындан сырткары ал 2015-жылы 20-августта аталган ишкана менен жана U.Q.I.T.C.L компаниясы аркылуу Кытайга тери, бут кийим жана башка ушул багыттагы товарларды ташуу тууралуу келишим түзгөн.Товарларды бажы аймагынан сырткары өндүрүүгө мыйзамсыз берилген уруксаттын натыйжасында 166 миллион сом бажы төлөмү мамлекеттик бюджетке түшпөй калган”, - деп жазылат маалыматта.

Нурбек Айбашевге Кылмыш-жаза кодексинин 304-беренесинин (кызмат абалынан кыянаттык менен пайдалануу) негизинде кылмыш иши козголуп, Биринчи Май райондук соту тергөө иштери аяктаганга чейин убактылуу кармоочу жайга камоо тууралуу чечим чыгарган. Анын баш коргоо чарасы 27-майда каралган.

Ал "Түндүк" темир жол бажысын 2016-жылдын апрелинен тарта башкарып, жакында гана кызматтан кеткен.