SUPER.KG'нин журналисти УКМКнын кызматкери менен "баарлашып" чыкты

Бүгүн, 28-майда SUPER.KG маалымат порталынын журналистине белгисиз телефон номери аркылуу жеке номерине телефон чалуу болгонун жазганбыз. Байланышкан адам өзүн Улуттук коопсуздук мамлекеттик комитетинин кызматкери катары тааныштырып, андан ары ал журналистти УКМКга келип кетүүсү керектигин билдирген эле.

Андан кийин УКМК SUPER.KG маалымат порталынын журналистин "баарлашууга" чакырды. Анын жүрүшүндө сөз Кубанычбек Кулматовдун УКМКга суракка чакырылганда тергөө аяктаганга чейин камакка алынгандыгы тууралуу кабар "баарлашууга" чакырууга себеп болгону билинди. УКМК бул маалыматты төгүнгө чыгарган соң, кабарга толуктоо киргизилген.

"Баарлашуу" учурунда чакыруунун себеби түшүндүрүлдү. Андан соң мындан ары УКМКга тиешелүү маалыматтарды чыгарууда алдын ала бул мекеменин басма сөз кызматынан тактоо керек экени эскертилди. Ошондой эле өлкөдө саясий абал жөнөкөй эмес болуп жатканда кырдаалды курчутпоо маанилүү экени айтылды", - деп билдирди УКМКга чакырылган SUPER.KG маалымат порталынын журналисти.

Эске салсак, SUPER.KG маалымат порталы бул окуя боюнча Улуттук коопсуздук мамлекеттик комитетинин төрагасы Идрис Кадыркуловго ачык кайрылуу жолдогон.