Кипрде көп кабаттуу үйдөн кулап, ооруканада жаткан Кыргыз жигити каза болду

Түндүк Кипрдин Гирне шаарында көп кабаттуу үйдөн кулап түшүп, абалы оор болуп жаткан 27 жаштагы Кыргыз жигити каза болду. Бул тууралуу Тышкы иштер министрлигинин басма сөз кызматкери Айымкан Кулукеева SUPER.KG порталына билдирди.

"Мекендешибиздин каза болгону тастыкталды. Дагы кошумча маалымат берилет", - деди маалымат катчы.

Эске салсак, окуя 24-май күнү болжол менен саат 10:45те болгон. Кыргыз жигити батирдин жогорку кабатынан кулап, оор жаракат алган. Биринчи жардамды аймактык ооруканадан алып, кийин Лефкоша шаарындагы мамлекеттик ооруканага жеткирилген. Ага аталган ооруканадан операция жасалып, андан соң комага түшүп калган. Кийинчерээк чет элдик басылмалар Кыргыз жигитин 4-кабаттан кулап, бетонго түшкөнүн жана денесинде бычактын издери болгонун жазып чыгышкан. Полиция кызматкерлери бул окуяны иликтөөгө алышкан.