Ысык-Көлдө катталган шамалдын кесепетинен социалдык объектилер менен турак үйлөрдүн чатырлары зыянга учурады

28-май күнү Ысык-Көл облусунун Жети-Өгүз районунда жана Каракол шаарында ылдамдыгы секундасына 14 метрге чейин жеткен шамал катталды. ӨКМнын маалымат кызматынан кабарлашкандай, анын кесепетинен социалдык объектилер менен турак үйлөрдүн чатырлары зыянга учурады.

"28-май күнү саат 13:00 чамасында Жети-Өгүз районунда ылдамдыгы секундасына 14 метрге жеткен шамал катталып, анын кесепетинен Кызыл-Суу айылында жайгашкан Жети-Өгүз райондук сотунун имаратынын чатырынын 235 чарчы метр тунукесин, Саруу айылында 2 турак үйдүн 10 даана шиферин, 162 чарчы метр тунукесин, 1 сарайдын 30 чарчы метр тунукесин учурган.

Ошондой эле саат 14:00 чамасында Каракол шаарында ылдамдыгы секундасына 12 метрге жеткен шамал катталган. Шамалдын кесепетинен "Келечек" бала бакчасынын кампасынын 3 даана шиферин, №127-көп кабаттуу үйдүн 80 чарчы метр тунукесин, №101-көп кабаттуу үйдүн 180 чарчы метр тунукесин, №1-орто мектептин 8 даана шиферин, Кара тумоого каршы бөлүмүнүн 114 чарчы метр тунукесин, автобазанын 600 чарчы метр тунукесин учурган", - деп билдиришти ӨКМдан.

Учурда Жарандык коргонуу комиссиясы тарабынан келтирилген чыгымдардын кесепеттери такталууда. Алдын ала алынган маалыматтар боюнча адам өмүрүнө зыян болгон эмес.