Бишкек шаардык кеңештин депутаты: "9 миң сомдук көчөттөрдү сатып алган мэрден отчёт ала албай жатканыбыз уят"

Бишкектин мэри Албек Ибраимов 2 жылдан бери шаардык кеңештин алдында толук отчёт бербей келет. Мындай пикирин бүгүн, 29-майда шаардык кеңештин жыйынында "Республика-Ата Журт" фракциясынан депутат Жусупбек Коргонбай уулу айтты.

"Албек Ибраимов кызматка келгенден бери жасаган иштеринин отчётун толук берген жок. Бүгүнкү жыйынга да майда маселелерди алып келиптирсиздер, 9 миң сомдук көчөттөрдү сатып алган мэрден отчёт ала албай жатканыбыз уят", - дейт Коргонбай уулу.

Аталган фракциянын лидери Канатбек Мүзүралиев Албек Ибраимовдун отчётун шаардык кеңештин кийинки отурумунун күн тартибине киргизүүнү сунуштады. "Биз фракция жыйынында бул маселени көтөргөнбүз, бирок президиумда сунушубуз колдоо тапкан жок. Бүгүнкү жыйында мэрдин отчётун угууну сунуштайлы дегенбиз, бирок вице-мэр Айгүл Рыскулованын кызматтан кеткенине байланыштуу бул маселени кеңештин кийинки отурумуна киргизүүнү чечтик", - деди Мүзүралиев.