Милициянын бөлмөсүндө бычакталып каза болгон кыздын сөөгү жерге берилди

Милиция бөлүмүндө бычакталып каза болгон маркум Бурулай Турдали кызынын сөөгү жерге берилди. Бул боюнча кыздын атасы Турдали Кожоналиев билдирди.

"Кызымды бүгүн саат 11:00дө жерге бердик. Жашоодон эч нерсе көрбөгөн кызым ушинтип кете берди. Бүгүн анын денесин майрам сууга алып жатып көкүрөгүнө Н+Б жана икс белгисин бычак менен жазып койгон жазууну көрдүк. "Н" деген тамга бул кызыма куда түшүп кеткен баланын атынын баш тамгасы. Мынчалык мыкаачылык менен өлтүргөнчө милициялар кайда жүрдү?" - деди маркумдун атасы.

Эске салсак, 27-майда 29 жаштагы жигиттин кызды ала качып бара жаткандыгы боюнча Биринчи Май РИИБине кабар келип түшкөн. Мындан көп узабай Сосновка айылындагы посттон Чүй ОИИББинин кызматкерлери Subaru Outback үлгүсүндөгү унааны токтотушуп, 29 жаштагы жигиттин 20 жаштагы кызды үй-бүлө куруу максатында ала качып бара жатканын аныктап, Жайыл РИИБине жеткиришкен. Кыз алган жаракатынан улам көз жумган. Ал эми жигиттин кесиптештери анын ичимдик ичпеген, ишине так бала экенин билдиришкен. Анын абалы оор экенин Жайыл райондук ооруканасынын башкы дарыгери айткан.
Бул окуя боюнча Жайыл райондук прокуратурасы Кылмыш-жаза кодексинин 316-беренеси (шалаакылык) боюнча Жайыл РИИБинин кызматкерлерине кылмыш ишин козгогон.