Сапар Исаков УКМКга сурак бергени кирип кетти. "Камап коюу коркунучу жок, мен акмын" деди мурдагы өкмөт башчы

Бүгүн, 29-майда мурдагы премьер-министр Сапар Исаков УКМКга сурак бергени келди. Ал суракка кирерден мурун журналисттердин суроолоруна жооп берди.

Анын айтымында, камап коюу коркунучу жок. Себеби мен акмын деди Исаков.

Ошондой эле ал Тарых музейинин тегерегиндеги чуу тууралуу пикирин айтып реконструкциялоодо салым кошконуна сыймыктанарын билдирди. "Ар бир өзүн сыйлаган өлкөнүн жакшы деңгээлдеги тарых музейи болуусу керек. Мурун музейде Лениндин эстелигинен башка эч нерсе деле жок болчу. Азыр киргилечи заңгырайт тим эле. Музейди реконструкциялоо биздин демилге болчу. Ал эми коррупциялык иштер боюнча атайын иликтөө жүргүзүш керек", - деди Исаков.

Буга чейин 26-апрелде Сапар Исаков Бишкек ЖЭБ боюнча козголгон кылмыш ишинин негизинде күбө катары УКМКда сурак берген. "Бишкек ЖЭБ боюнча менин күнөөм бар деген сөздөр чындыкка дал келбейт", - деп ал журналисттерге билдирген.

14-майда Сапар Исаков 2-жолу суракка барган. Анда УКМКга кирип баратып, "саясий куугунтук болуп жатат" деп айткан. Сурак түштөн кийин да уланган.

Эске салсак, 26-январда Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Мындан улам бир жыл мурун Кытайдан алган 386 миллион доллар менен жаңыланган ЖЭБге карата сын-пикирлер күчөгөн. Бул факты боюнча кылмыш иштери козголуп, тергөөнүн жүрүшүндө бир топ жооптуу кызматкерлер кармалган.