Дарыгер: "Милиция бөлүмүндө кызды бычактап өлтүрүп, өзүнө да бычак сайган адамдын абалы жакшыра баштады"

Жайыл районундагы милиция бөлүмүндө 20 жаштагы кызды бычактап өлтүрүп, өзүнө да бычак сайган адамдын абалы жакшыра баштады. Бул тууралуу Жайыл райондук ооруканасынын башкы дарыгери Болот Майканбаев бүгүн, 29-майда SUPER.KG порталына билдирди.

"Барган сайын баланын абалы жакшы болуп баратат. Бүгүн сүйлөй баштады. Абалы биротоло туруктуу болгонго чейин дарыгерлердин көзөмөлүндө болот", - деп билдирди башкы дарыгер.

Буга чейин 27-май күнү 29-жаштагы Б.Д. үй-бүлө куруу максатында 20 жаштагы Т.Б. аттуу кызды ала качып бара жаткан жеринен кармалып, милиция бөлүмүндө кызды бычактап салгандыгы тууралуу кабарланган. Ал кызды бычактагандан кийин өзүнө да бычак сайып, экөө тең оор абалда ооруканага жеткирилген. Кыз алган жаракатынан улам көз жумган.

Бүгүн, 29-майда бул окуя боюнча Жайыл райондук прокуратурасы тарабынан жумушуна шалаакылык мамиле кылган милиция кызматкерлерине кылмыш иши козголду.