Криштиану Роналдунун "Реалдан" кете турганы айтылууда

"Реал Мадрид" клубунун оюнчусу Криштиану Роналду "ПСЖ" клубуна өтүүнү көздөп жатат. Бул тууралуу чет элдик басылмалар жазып чыгышты.

Маалыматка ылайык, футболчунун агенти Жорже Мендеш Франциянын Париж шаарына "ПСЖ" клубунун өкүлдөрү менен Роналду тууралуу сүйлөшүүгө барды. Мындан сырткары 29-майда "Реалдын" клубдук расмий сайтында чабуулчунун сүрөтү алынганы маалымдалды.

27-майда Роналду "Реалдын" курамында 4-ирет Чемпиондор Лигасын жеңгенден кийин: "Келечегим тууралуу кийинчерээк айтам. Мен падышалык клубдун курамында ойногонума сыймыктанам. Ал эми жоопту алдыңкы күндөрдө берем", - деп айткан. Португалиялык оюнчу жаңы келишимдин шарттарына нааразы экенин билдирген.

Роналду англиялык "Манчестер Юнайтедден" "Реалдын" катарына 2009-жылы кошулган. Быйылкы сезондо королдук клубдун курамында 45 беттеш өткөрүп, 45 гол киргизген.