Чүйдө адамдын жансыз денеси табылгандыгы тууралуу маалыматты көңүл сыртында калтырган милиция кызматкерлери боюнча кызматтык иликтөө дайындалды

Чүйдө адамдын жансыз денеси табылгандыгы тууралуу маалыматты көңүл сыртында калтырган милиция кызматкерлери боюнча кызматтык иликтөө дайындалды. Бул тууралуу Чүй ОИИББинин басма сөз кызматынан билдиришти.

Маалыматка ылайык, Сокулук районунун Студенческий айылынын тургундары алардын айылында жансыз дене табылып, ал тууралуу милиция кызматкерлерине кабар беришсе, алар келбей жатканын журналисттерге билдиришкен. Тургундардын пикири жалпыга маалымдоо каражаттарына жарыяланган соң ал жерге милиция кызматкерлери барып, факты боюнча иликтөө иштерин башташкан. Кийин маркумдун Жалал-Абад облусунун 1972-жылы туулган К.Б. аттуу тургуну экени белгилүү болгон.

Ал эми адамдын жансыз денеси табылгандыгы тууралуу маалымат боюнча окуя болгон жерге барбаган милиция кызматкерлерине карата кызматтык иликтөө дайындалган.