"Мен өз тапшырмамды аткардым". Украинада өлтүрүлгөн журналист тирүү болуп чыкты

30-майда Украинада атып өлтүрүлдү делген журналист Аркадий Бабченко тирүү. Бул тууралуу чет элдик басылмалар Украинанын атайын кызматына таянуу менен жазып чыгышты.

Маалыматка караганда, атайын кызмат өткөргөн маалымат жыйынга Бабченко да катышкан.

"Бабченконун "өлтүрүлүшү" атайын даярдалган операциянын негизинде өттү. Биз анын үй-бүлөсүнөн кечирим сурайбыз. Бабченкону болсо үчүнчү туулган күнү менен куттуктайбыз. Аны өлтүрүү тапшырмасы чынында эле болгон. Бул тапшырманы аткарууга Украина жараны тандап алынган. Ага акчанын жарымы берилген экен", - деди Украинанын атайын кызматынын башчысы Василий Грицак.

Ошондой эле Грицак Бабченкону өлтүрүү тапшырмасын Орусиянын атайын кызматы берген деген пикирде.

Журналист Бабченко бир ай мурун аны өлтүрүү үчүн адам жалданганын айтты. "Менин өмүрүм үчүн ага 30 миң доллар сунушташыптыр. Ага менин документтерим менен сүрөтүмдү беришиптир. Мындан улам бул иштин артында Орусия турганын түшүндүм. Себеби аталган маалыматтар Орусиянын атайын кызматында гана бар. Мага ушул операцияны аягына чыгаруу сунушу берилди. Макул болдум. Бул операция үчүн 1 ай даярдандык. Мен кечээ өлүшүм керек эле. Мен өз тапшырмамды аткардым. Бирок азырынча тирүүмүн", - деди Бабченко.

Бул окуяга байланыштуу Орусиянын Тышкы иштер министрлиги билдирүү таратты. Анда бул ишти Орусияга карата жасалган "кезектеги чагым" деп атаган. Дүйнө коомчулугун дүрбөлөңгө салганы үчүн орус бийлиги Украинаны күнөөлөдү.

Эске салсак, 30-майда Украинанын Киев шаарында орусиялык журналисттин атып өлтүрүлгөнү тууралуу маалымат тараган.