Кыргыздын алгачкы өлкө башчысы Абдыкадыр Орозбековдун сөөгү табыла электигине депутат нааразы

Кыргыздын алгачкы өлкө башчысы Абдыкадыр Орозбековдун сөөгү дале табыла элек. Мындай маалыматты бүгүн, 31-майда парламент жыйынында депутат Мурадыл Мадеминов айтып чыкты.

Эл өкүлүнүн айтымында, Орозбековдун сөөгүн экс-президент Алмазбек Атамбаевдин тапшырмасы менен УКМК издеп, бирок документтер жок болуп кеткендигинен токтотулган.

“Абдыкадыр Орозбеков Кыргыз автономиялуу республикасын түзүүгө чоң салым кошкон. Бул кийин Кыргыз Советтик Социалисттик Республикасы болуп өзгөргөн. Ал кыргыздын алгачкы жетекчиси да болгон. Орозбеков эл душманы катары Төрөкул Айтматов, Баялы Исакеев жана Касым Тыныстанов менен бирге атылып кеткен. Кийин акталган. Бирок анын кайсы жерге көмүлгөнү жөнүндө эч кимде маалымат жок.

Экс-президент Алмазбек Атамбаевдин учурунда УКМКга анын сөөгүн табуу боюнча тапшырма берилген. Бирок алардан “Орозбековго тийиштүү документтер жок кылынган” деген жооп келген. Бул инсандын 130 жылдык мааракесин жогорку деңгээлде өткөрүүнү өкмөттөн суранат элем”, - деди Мадеминов.

Эске салсак, Абдыкадыр Орозбеков 1889-жылы азыркы Баткен облусунда туулган. 1927-жылы Кыргыз АССРинин Борбордук Аткаруу комитетинин төрагасы болуп шайланган. 1938-жылы жалган жалаа менен атылып кеткен. 1956-жылы акталган. Азыркыга чейин сөөгү кайсы жерге коюлганы белгисиз.