Рыскелди Момбеков өкмөткө: "Силер Атамбаев менен Исаковдун кадрлары менен күрөшүп жатасыңар"

"Өкмөт аймактардагы кадрларды кыскартпастан борбордук аппараттагы ашыкча кадрлардан тазаланышы керек", - деп бүгүн, 31-майда парламент жыйынында депутат Рыскелди Момбеков өкмөт өкүлүнө кайрылды.

Депутат министрди 10 адам коштоп жүрөт деп сындады. "Силер кызматкерлерди кыскартабыз деп туура эмес тартипте иштеп жатасыңар. Мага аймактардан кыскартуу болуп жатат деп кайрылып жатышат. Бир министрди 3 орун басары, аппарат башчысы, статс-катчысы, ардактуу айдоочусу болуп 10 адам ээрчип жүрөт. Анын унаасы, бекер бензини бар. Айылдагы интеллигенттерди кыскартпай, жогорку аппараттан кыскартпайсыңарбы.

Биздин жардамчыбыз эле бар. Министрди 10 киши жандап жүрөт. Бийликтин көйнөгү алмашат, элдин көйгөйү эч алмашпайт. Аппараттагы компьютерден башканы билбеген, костюм-шым кийип, бут кийимин жылтыратып жүргөндөрдү кыскартпайсыңарбы? Силер Атамбаев менен Исаковдун кадрлары менен күрөшүп жатасыңар”, - деди Момбеков.