Ысык-Көлдө "Дүйнөнүн сулуу айымы-2018" наамынын ээси жол кырсыгына кабылып каза болду

Кыргыз өлкөсүнөн чыккан "Дүйнөнүн сулуу айымы-2018" наамынын ээси Сания Шакирова жол кырсыгына кабылып каза болду. Мындай маалыматты Ысык-Көл ОИИБинин басма сөз кызматы маалымдады.

Маалыматка караганда, окуя кечээ, 2-июнда саат 21:30дар чамасында Балыкчы-Ананьево-Каракол жолунда орун алган.

"Унаада 1 айдоочу жана 2 жүргүнчү болгон. Алар Ысык-Көлдөн Бишкекти көздөй бара жатып Чок-Тал айылынын кире беришиндеги мүрзөнү курчаган дубалды сүзүп кеткен. Окуя болгон жерден С.Шакирова аттуу айым каза болгон. Дагы бир 31 жаштагы жүргүнчү алган жаракатынан улам Чолпон-Атадагы ооруканага жеткирилген. Ал эми айдоочу туугандары тарабынан Бишкек шаардык №4-ооруканага жеткирилген. Учурда бул факт боюнча Кылмыш-жаза кодексинин 281-беренеси (транспорт каражаттарынын кыймылынын жана аларды пайдалануунун коопсуздук эрежелерин бузуу) менен кылмыш иши козголуп, тергөө иштери жүрүп жатат", - деп билдирди басма сөз кызматы.

Ал эми продюсер Ассоль Молдокматова кечээ, 2-июнда Ысык-Көлдөгү жол кырсыгына кабылып, каза болгон аял "Дүйнөнүн сулуу айымы-2018" Сания Шакирова экенин социалдык тармактагы жеке баракчасына жазып чыккан.

Белгилей кетсек, Сания Шакирова 2018-жылы 28-марттан 4-апрелге чейин Вьетнамдын Нянчанг шаарында өткөн "Miss Universe Beauty" (Турмуш курган эң сулуу келиндерди аныктоочу дүйнөлүк сынак) эл аралык сынагына катышып, "Missis world" ("Дүйнөнүн сулуу айымы-2018") наамын жеңип алган.