Орусияда дайынсыз жоголгон кыздын жансыз денеси муздаткычтан табылды

Орусияда дайынсыз жоголгон 7 жаштагы кыздын жансыз денеси көчөдөгү эски муздаткычтын ичинен табылган. Мындай маалыматты чет элдик басылмалар жазып чыкты.

Маалым болгондой, окуя Кемерово облусуна караштуу Белово шаарында катталган. 29-майда кыздын атасы полиция кызматкерлерине кызы ойногону чыгып кеткен бойдон дайынсыз болуп жатканын кабарлаган. Аталган фактынын негизинде кылмыш иши козголуп, күч органдары, ыктыярчылар, мугалимдер жана жергиликтүү тургундар издөөгө чыккан. Кызды тапкандарга 1 миллион рубль сүйүнчү каралган.

Издөөнүн натыйжасында кыздын өлүгү көчөдөгү эскилиги жеткен муздаткычтын ичинен табылган. Анын денесинде эч кандай жаракат же зордуктоонун белгилери болгон эмес. Мындан улам кыздын өлүмүн аныктоо үчүн соттук медициналык экспертиза дайындалган. Тергөөчүлөр кыз оюн учурунда муздаткычтын ичине кирип кайра чыга албай калган болушу мүмкүн деп божомолдоодо.