"Дүйнөнүн сулуу айымы-2018" наамынын ээси Сания Шакирова кырсыкка кабылган унаанын айдоочусу дарыланууда

"Дүйнөнүн сулуу айымы-2018" титулунун ээси Сания Шакирова бараткан унаанын айдоочусу Бишкектеги 4-шаардык ооруканада дарыланууда. Жакынкы арада анын акырегине операция жасалат. Бул тууралуу SUPER.KG порталына оорукананын Травматология жана ортопедия илим изилдөө борборунан билдиришти.

Маалыматка караганда, Ч.К. аттуу жаран 2-июндан 3-июнга караган түнү саат 3:30да келип түшкөн.

"1987-жылы туулган Ч.К. медициналык кароолордон өтүп, натыйжада анын баш мээсинин чайкалганы, акырегинин сынганы аныкталган. Пландык эрежеге ылайык, алгач дарылануусу бүткөндөн кийин анын акырегине операция жасалат", - деп кабарлады аталган борбордон.

Белгилей кетсек, 2-июнда саат 21:30дар чамасында Балыкчы-Ананьево-Каракол жолунда Кыргыз өлкөсүнөн чыккан "Дүйнөнүн сулуу айымы-2018" наамынын ээси Сания Шакирова жол кырсыгына кабылып каза болгон. Унаа Чок-Тал айылынын кире беришиндеги мүрзөнү курчаган дубалды сүзүп кеткен. Окуя болгон жерден бир жүргүнчү алган жаракатынан улам Чолпон-Атадагы ооруканага жеткирилген. Ага амбулатордук жардам көрсөтүлгөндөн кийин үйүнө чыгарылган.