Милиция бөлүмүндө алгач кызга, андан соң өзүнө бычак сайган жигит жандандыруу бөлүмүнөн палатага которулду

Милициянын бөлүмүндө алгач Бурулайга, андан соң өзүнө бычак сайган Марсбек Б. жандандыруу бөлүмүнөн палатага которулду. Бул тууралуу SUPER.KG порталына Жайыл райондук ооруканасынын башкы дарыгери билдирди.

"Учурда Марсбектин абалы канааттандырарлык. Ал бир аз сүйлөп, тамак ичип калды. Бычак тийген жерлери жакшы айыга элек. Дагы бир аптадан кийин ооруканадан чыгышы толук мүмкүн", - дейт дарыгер.

Ошондой эле дарыгер Марсбек Б. 2 милиция кызматкеринин кароосунда болуп, алар жанында болуп жатканын кошумчалады.

Эске салсак, 27-майда 29 жаштагы жигиттин кызды ала качып бара жаткандыгы боюнча Биринчи Май РИИБине кабар келип түшкөн. Мындан көп узабай Сосновка айылындагы посттон Чүй ОИИББинин кызматкерлери Subaru Outback үлгүсүндөгү унааны токтотуп, 29 жаштагы жигиттин 20 жаштагы кызды үй-бүлө куруу максатында ала качып бара жатканын аныктап, Жайыл РИИБине жеткиришкен. Милиция бөлүмүндө жигит кызды бычактап, андан кийин өзүнө да бир нече жолу бычак сайып жиберген. Кыз алган жаракатынан улам көз жумган. Ал эми жигиттин кесиптештери анын ичимдик ичпеген, ишине так бала экенин билдиришкен. Анын абалы оор экенин Жайыл райондук ооруканасынын башкы дарыгери айткан.
Бул окуя боюнча Жайыл райондук прокуратурасы Кылмыш-жаза кодексинин 316-беренеси (шалаакылык) боюнча Жайыл РИИБинин кызматкерлерине кылмыш ишин козгогон.