Чүй ОИИББи: "Сокулукта 36 жаштагы киши аялын жана эки уулун сабап, көчөгө таштап койду"

Чүй облусунун Сокулук районунда 36 жаштагы киши аялын уруп, ал коркуп качып кеткенде балдарын сабап, денелерине залал келтирип, көчөгө таштап койду. Бул тууралуу SUPER.KG порталына Чүй ОИИББинин басма сөз кызматынан билдиришти.

Мекемеден билдиришкендей, 4-июнда саат 21:00 чамасында Сокулук райондук ооруканасына 2 жана 5 жаштагы эки бала денесиндеги ар кандай жаракаттары менен түшкөнү кабарланган.

"Бул факт боюнча ыкчам-тергөө тобу чыгып бара жатканда, Сокулук айылында жашаган 24 жаштагы аял оозеки арызы менен кайрылган. Ал 36 жаштагы күйөөсү мас абалында эч себепсиз аны сабай баштаганда үйүнөн коркуп качып кеткенин айтты.

Андан соң күйөөсү үйдө калган уулдарын кармап, уюлдук телефон кубаттагычы менен эч себепсиз кыйнап, уруп-сабап денелерине залал келтирип, көчөгө таштап койгонун билдирген. Кошуналар сабалган балдарды көрүп, "Тез жардам" кызматын чакырып райондук ооруканага жеткирген", - дешти милициядан.

Учурда эне жана балдары ар кандай жаракаттар менен райондук ооруканада дарыланып жатканы айтылды. Аларды сабады делген киши кармалды. Тергөө иштери уланууда.