Депутат: "Саламаттыкты сактоо министрлиги аялдарга майып балдарды төрөбөө керектигин түшүндүрсүн"

"Көпчүлүк аялдар ден соолугунун мүмкүнчүлүгү чектелген балдарын күйөөлөрү жок жалгыз чоңойтушууда". Бул тууралуу бүгүн, 7-июнда Жогорку Кеңештин жыйынында депутат Ирина Карамушкина айтты.

Эл өкүлү Саламаттыкты сактоо министрлиги аялдарга ден соолугунун мүмкүнчүлүгү чектелген балдарды төрөбөө боюнча түшүндүрүү иштерин жүргүзүшү керектигин кошумчалады.

"Мен башка өлкөлөрдү билбейм, бирок биздин эркектер үй-бүлөсүн жана аялын материалдык, физикалык жана башка кыйынчылыктарга жалгыз таштап кетүүдө. Бул долбоорду ишке ашырууга акча каражаты жок деп жатасыздар. Жакында эле мыйзамсыз жолдор менен байыган адамдардын мүлктөрү камакка алынып, мамлекетке өткөрүлдү го. Эмнеге ошол каражаттарды ушул тармакка багыттаганга болбосун?" - деди Карамушкина.

Бүгүн парламентте "Туруктуу багып-тарбиялоого муктаж ден соолугунун мүмкүнчүлүгү чектелген балдарды баккан адамдардын эмгегине акы төлөө жөнүндө" Жогорку Кеңештин токтомунун долбоору каралып, добуш берүүгө жиберилди.

Маалыматка караганда, ден соолугунун мүмкүнчүлүгү чектелүү балдарды баккан адамдарга айына 4900 сом акы төлөө сунушталууда. Долбоорду ишке ашыруу үчүн 370 миллион сом каражат керектелет.

Демилгечи депутаттар: Мирлан Бакиров менен Дастан Жумабеков.