Төкмө акын Бурулайга арнап ыр төктү

Бүгүн, 9-июнда Бишкекте Бурулай Турдали кызынын окуясына байланыштуу кыз-келиндердин укуктарын коргоо боюнча акция өткөрүлдү. Ага жалпы 200дөй кыз-келин катышса, экс-президент Роза Отунбава, Кыргыз Эл артисти Назира Мамбетова, Кыргыз Эл жазуучусу Гүлсайра Момунова жана башкалар келип иш-чараны колдоого алышты.

Иш-чара учурунда төкмө акын Азамат Болгонбаевге сөз берилип, ал Бурулайга арнап комуз менен ыр төктү.

"Бир кыздын кайгы-муңунан,

Кыргыздын жаны ооруду.

Тоолордун акпай булагы,

Талаанын гүлү соолуду.

Берметтей жаркып турганда Бурул,

Бейажал келип тооруду", - деп айтылды акындын ыр саптарында.

Акциянын аягында катышуучулар Бурулайдын сүрөтүн, кыздарга карата зордук-зомбулукка каршы маңызда жазылган плакаттарды кармап Уркуя Салиеванын эстелигинен Ак Үйгө чейин жөө жүрүш жасашты.

Уюштуруучулар мындай акция акыркы эместигин, ала качууну, кордук көрсөтүүнү токтотууну талап кылган дагы бир топ иш-чаралар уюштуруларын айтып тарап кетишти.

Эске салсак, 27-майда 29 жаштагы жигит 20 жаштагы кызды ала качып бара жатып Сосновка айылындагы посттон кармалып, Жайыл РИИБине жеткирилген. Бирок ал бала кызды ошол жерден бычактап, өзүн да өлтүрүүгө аракет кылган. Аталган факты боюнча кылмыш иши козголуп, ИИМдин 20дан ашык кызматкери жумуштан бошотулган.