Бишкекте ишкер 53 миллион сом салыкты төлөбөй жүргөн деп кармалды

Бишкектеги ишканалардын бири ири өлчөмдөгү салыкты төлөбөй жашырып жүргөнү аныкталды. Бул тууралуу Экономикалык кылмыштарга каршы күрөш боюнча мамлекеттик кызматынан билдиришти.

“Биздин мекеме салык мыйзамдарын аткаруу боюнча текшерүү жүргүзгөн. Натыйжада “А.К” жоопкерчилиги чектелген коомунун бир нече убактан бери өлкө казынасына 53 миллион сом салыкты төлөбөй жашырып жүргөнү аныкталган. Бул иш боюнча Кылмыш-жаза кодексинин 2013-беренесинин (чарба жүргүзүүчү субъектилердин кызмат адамдарынын ири өлчөмдө салыктарды төлөөдөн четтөөсү) негизинде кылмыш иши козголгон. Мындан сырткары текшерүүдө “А.К” ишканасынын жетекчисине салык төлөбөй жүргөн дагы алты ишкана тиешелүү экени аныкталган”, - деп жазылат билдирүүдө.

Козголгон кылмыш ишинин алкагында ал компаниялардын негиздөөчүсү Х.С камакка алынган. Тергөөнүн жүрүшүнө ылайык, компаниянын жана анын негиздөөчүсүнүн аты убактылуу аталбай тургандыгы айтылды.