Муфтият: "Орозо айт Айдын жаңырышына карата 15-июнда же 16-июнда белгилениши мүмкүн"

Орозо айт майрамы 15-июнь күнү же 16-июнда белгилениши мүмкүн. Так күнү Айдын жаңырышына карап чечилет. Мындай билдирүүнү мусулмандар дин башкармалыгынын басма сөз кызматы билдирди.

"Азыр болжолдуу түрдө 15-июнь Орозо айт майрамы катары белгиленди. Айдын жаңырышына карата ортодо бир күн айырма болушу мүмкүн", - дейт басма сөз кызматы.

Ал эми коомдогу "15-июнь Орозо айт майрамы болсо, 29 күн эле орозо кармап калабызбы" деген суроого аталган башкармалыктан төмөндөгүдөй жооп беришти.

"Эгер Ай орозонун 29-күнүндө жаңырса, анда 29 күн кармалат. Эгер 30-күнүндө жаңырса, анда толук 30 күн кармалат. Мунун эч кандай терс таасири жок. Айдын жаңырышы Алла Тааланын эркинен. Былтыр деле орозону 29 күн кармаганбыз. Мындай көрүнүш буга чейин болуп келген, мындан ары деле кайталана берет", - дейт мусулмандар дин башкармалыгы.

Эске салсак, буга чейин Орозо айт 15-июнга белгиленген.