Күйөөмдөн кордук көрдүм деген келин: "Күйөөмдүн токмогунан тажап ажырашайын десем, бензин чачып өрттөйм деп коркутат"

"Жолдошум мас болуп келгенде мага кол көтөрчү. Бир жолу короодогу баламды жетелеп кетип, "бул менин балам эмес, бул балага жин кирип кеткен. Мындайларды өрттөп салыш керек" деп 3 жарым жаштагы баламды кордоптур", - дейт күйөөм тарабынан кордук көрдүм деген Мээрим Өмүрбекова.

Мээрим Өмүрбекова эки ирет турмуш курган. Биринчи жолдошу менен бир кыздуу болгондон кийин ажырашып кеткенден кийин азыркы жолдошуна турмушка чыккан. Бул жолдошу менен 6 жылдан бери жашап, бул жылдар аралыгында өзү эле эмес, баласы дагы күйөөсүнүн ур-токмогуна кабылып келгенин SUPER.KG порталына айтып берди.

"Кызым таенесинин колунда. Азыркы жолдошум Нарындын Миң-Куш деген айылынан. Ага 2012-жылы турмушка чыккам. Бир айдан кийин эле жолдошум ичип келип себепсиз кол көтөрө баштады. "Сени кетириш керек. Сага адашып үйлөнүп алыптырмын" дей берчү болду. Бирок соолукканда "мас болуп билбей калыптырмын, кечирип койчу" деп кечирим сурайт. Жаңы турмуш курганда кайнагам, абысыным дагы биз менен чогуу жашачу. Инисинин ичип, чатак салганын көрүп "ичпейм дебедиң беле, токтот" деп калды. 3-4 ай ичпей жакшы эле жүргөн. Огород сугарам деп чыгып кетип огородго суу салбай эле ичип келиптир. Сыртынан сыр билгизбей жүргөнүнөн күрөктү сыртка койбой киргизип койбосуңбу деп калдым. "Сен мага акыл үйрөтүп калдың беле" деп күрөк менен бутума уруп калды. Кош бойлуу элем. Таң атканча жээрип, коркутуп отурду. Соолуга түшкөндө эле "билбей калыптырмын" деп чыга келет. Өзүм мектепте мугалим болуп иштейм. Жаңы окуу жылы башталып жумушка чыктым. Анда деле ичип келип "директор менен ойноп жүрөсүңбү же дене тарбиядан сабак берген мугалим мененби?" деп чаң салды. Ошентип төрөгөнгө чейин ызылдашып жашап жүрдүк", - дейт ал.

Анын төрөттөн кийинки жашоосу тозокко айланган. Анткени наристеси 3 күндөн кийин чарчап калган. Ал эми күйөөсү аны бала төрөй албайсың деп кордогон.

"Толгоом оор болуп, кесарево жолу менен төрөгөм. Ымыркайым 3 күндөн кийин чарчап калды. Бул окуядан кийин күйөөм 2 ай ичпей жүрдү. Бир күнү тоого малга барып келем деп кетип, ал жактан ичип келди. Ал ичкен күнү үйдө тынчтык жок. "Сен соо бала дагы төрөй албайсың. Бала тууй албаган эмне деген катынсың?" дейт. Кетип калайын десем, эч жакка чыгарбай кайтарып алат. Жолдошум жокто кетип калайын десем, биздин айылда маршруттук каттам бир эле жолу жүрөт", - деп кошумчалады.

Экинчи ирет кош бойлуу болгондо ур-токмогу азайганын, бирок ичип келгенде коркутуу болгонун билдирди.

"Кайрадан кош бойлуу болгонумда мурдагыдай көп токмоктобой калды. Бирок сен бул баланы дагы өлтүрүп саласың" деп жемелей берди. Анын үстүнө боюмдан түшүп калуу коркунучу бар болчу. Декреттик өргүүгө эртерээк чыккандан кийин Караколго төркүнүмө кетип калдым. Ызы-чуудан кулагым тынчып, төрөтүм дагы жеңил болду. Жолдошум январдын аягында келип алып кетти. 1 айдан кийин мектептеги жумушума чыктым. Бирок катуу ооруп, ооруканага барсам, өпкөмө суу толуп калыптыр. Бишкекте 2 ай дарыландым. Жолдошум баламды карап айылда болду. Анда дагы "сен дарыгерлер менен соо эмессиң, болбосо ооруканада неге мынча көп убакыт жатып аласың" дегенинен толук дарыланбай чыгып кеттим".

Баласы 9 айлык болуп калганда баягы оорусу дагы козголгон. Бишкекке келип дарылана баштаганда күйөөсү үйгө бир жолу келип кет деп, келгенде сабап салганын айтты.

"Мени ургандан кийин өкүл апамдын үйнө качып барып, эртеси кокту менен чыгып, маршруткага отуруп төркүнүмө кетип калдым. Балам үчүн кайра келсем "балаңды баккан жоксуң, биз бала багып куурадык" дейт. Бычак кезеп, көсөөнү ысытып алып денеңе басып таштайм деп коркутат. "Көрүнгөн эркек менен жүрүп кеттиң" деп кофтамдын жеңи менен муунтат. Көзүм аңтарылып өлөйүн деп калганда коё берет. Айлам кетип Чаектин милиция кызматкерлерин чакыргам. Алар келип жолдошум менен өзүнчө сүйлөшүп "болду сага кол көтөрбөйт, эгер бирдеме десе, бизди кайра чакыр" деп кетип калышты. Бир күнү окуу жылы аяктап, мектептен келсем, топ тепкендей кылып эле тепкилеп салды. Милицияларга өзү чалып "аялымды сабап жатам, келбейсиңерби" деп кекетип сүйлөдү. Мени урганда дайыма баламды кайненеме же кайнатама карматып башка бөлмөгө киргизип койчу. Алар арачага түшсө аларды үйдөн кууп, сыртка сүйрөп чыгат. Алар сыртта калып, эшикти каккылап, үйгө киргизип койчу деп суранышат", - дейт ал.

Ушунча кордуктан кийин Мээрим Өмүрбекова төркүнүнө кетип калган. Күйөөсү артынан Караколго барып, батирде 2-3 ай жакшы турмуш өткөрүп баштаган. Бирок ичкилигин токтотпой баласын өрттөйм деп чыккан.

"Караколго келгенден кийин деле ичип жүрдү. Кет десем, "мага ушул жак жакты" деп болбойт. Жашообуз болбойт экен деп апамдыкына кетип калдым. Мен жумушка кеткенде короодо ойноп жаткан баламды ээрчитип кетиптир. Мейли кантсе да атасы, кичинесинен баккан, уулуна жамандыгы жок деп ойлодум. Эртеси күнү телефон чалып "Балабызга жин кирип кетти, денесинин баары кызарып чыкты. Мечитке алып барып дем салдырыш керек" деп калды. Денесинин кызарганы ал таттууну көп жегенден экен. Күйөөмө баламды мага алып кел дедим. Келгенде баламдын денеси муздай болуп калыптыр, катуу үшүп калган окшойт. Дароо эле жылуу ороп жаткырып койдум. Эртеси аллергияга каршы дары-дармектерди алып келип, апама табыштап өзүм жумушка кеттим. Балам бат эле өзүнө келди. Бир күнү батирдин ээси чалып "күйөөң ичет экен, батирди бошоткула" деди. Эртеси барсам бир кошуна эже чыгып "Сен балаңды күйөөңө таштап койгон кандай таш боор энесиң!? Кечээ жолдошуң мас болуп алып "Бул менин балам эмес. Менин балам үйдө, уктап жатат. А бул балага жин кирип кеткен. Мындайларды азыр эле өрттөп салыш керек. Бул бала чума болуп ооруп калган. Качкыла, жолобогула, силерге да жугуп калат. Бул баланы өрттөп, жок кылыш керек" деп эч кимибиздин сөзүбүздү укпай койду. Баланын апасын уруп же өлтүрүп алган окшойт деп бактардын түбүн карап чыктым. Балаң "ата" деп кыйырганда жолдошуң эсине келип, баланы кучактап отуруп калды" дейт кошуна эже. Муну уккандан кийин үйгө келерим менен баламдын денесин карап, сүрөткө тартып алдым. Бирок эч нерсе болбоптур", - дейт ал.

Өмүрбекованын айтуусунда, күйөөсү аны "сен мени күч күйөө кылдың" деп көпчүлүктүн көзүнчө деле кол көтөрүп, тепкилейт. Мындан улам ал Караколдогу укук коргоо органдарына кайрылып, арыз жазган. Учурда ал күйөөсү менен ажырашуу үчүн документ чогултуп жатат. Бирок жолдошу "мени менен ажырашсаң, балага алимент төлөбөйм. Сени бензин чачып өрттөп кетем" деп коркутканын айтты.

SUPER.KG порталы Өмүрбекованын жолдошу менен байланышуу аракетин көрүүдө. Экинчи тараптын пикирин угуп, жарыялоого даярбыз.