Кыргыз-Тажик чек арасындагы жаңжалдан кийин эки эл ынтымакка келип, ооз ачар уюштурушту

Кыргыз-Тажик мамлекеттик чек ара тилкесинде орун алган жаңжалдан кийин Максат айылында эки элди ынтымакка чакырган ооз ачар уюштурулду. Бул тууралуу аталган айылдын тургуну маалымдады.

Маалыматка ылайык, Кулунду айыл өкмөтүнө караштуу Максат айылында кечээ, 12-июнда Кыргыз-Тажик ынтымагын бекемдөө максатында ооз ачар уюштурулган. Мындай демилгени эки эл көтөрүп чыккан. Ооз ачарга Кулунду айыл өкмөтүнүн кызматкерлери, айыл аксакалдары жана коңшу Тажикстандан 5-6 аксакал келген.

Буга чейин Кыргыз чек ара кызматы Кыргыз-Тажик мамлекеттик чек ара тилкесиндеги жаңжал Тажик чек арачыларынын жүрүм-турум эрежелерин сактабагандыгынан келип чыкканын билдирген. Анда Тажик чек арачылары Лейлек районунун Максат айылындагы футбол талаасынын аймагында соода кылып отурган Кыргыз жарандарын кууп башташканы, мындан улам 2 тарап ортосунда чыр чыкканы белгиленген.