Өзүн "депутатмын" деп тааныштырып, тургундарды алдап жүргөнгө шектүү аял кармалды

Ички иштер министрлигиндеги Криминалдык милиция бөлүмүнүн опер кызматкерлери алдамчылыкка шектелип издөөдө жүргөн Чүй облусунун жашоочусун кармады. Бул тууралуу ИИМдин маалымат кызматы кабарлады.

Маалыматка ылайык, ыкчам иликтөө иштеринде кармалган аял өзүнүн максатына жетүү үчүн тургундар менен "жогорку кызматта иштеген адаммын" деп таанышып, бардык көйгөйлөрдү чече алуусун айтып жүргөнү аныкталган. Ошондой эле бир нече чоң кызматта иштеген адамдар менен телефон аркылуу сүйлөшүп жаткандай түр көрсөтүп жабырлануучулардын ишенимине кирген.

Милиция алдамчылыкка шектелип издөөдө жүргөн аял 58 жаштагы Аламүдүн районунун тургуну экенин аныктаган. Ал 2014-жылы Ош облусунун тургунунун ишенимине кирип, өзүн мэрияда иштейм деп тааныштырып, жер тилкесин алып берүү убадасы менен андан 4 миң 500 доллар, 6 миң 900 сом алган. Андан кийин ал тургунга дайынын билдирбей кеткен. Ошол жылы Ош ШИИБи алдамчылык беренеси менен ага кылмыш-изин козгоп, шектүүгө издөө жарыялаган.

Издөө иштеринин алкагында А.Т. аттуу шектүү аялдын бир нече мамлекеттик мекемелерге жана жарандарга өзүн Жогорку Кеңештин депутатымын деп тааныштырып, телефон аркылуу сүйлөшкөнү белгилүү болгон. Бир ирет "Администрациядан чалып жатам" деп электриктерге үйүнүн оңдоо иштерин жасаткан.

Криминалдык милиция бөлүмү шектүү аялга алданып калгандар болсо же ал тууралуу маалыматтарды билгендер болсо 0702 000 170, 0555 36 50 01, 0312 26 63 21 номерлерине кабарлап коюуну өтүнөт.