Сооронбай Жээнбеков: "Орозо айында береке жаап, таза тилек менен жасалган иштер арбын болду"

Бүгүн, 15-июнда президент Сооронбай Жээнбеков мекендештерди Орозо айт майрамы менен куттуктады. Бул тууралуу президенттик аппараттын басма сөз кызматы билдирди.

"Сиздерди руханий тазаланууну, тынчтыкты жана мээримдүүлүктү даңазалаган Орозо айт майрамы менен чын жүрөктөн куттуктайм! Орозо айт ар бир мусулман үчүн улуу күн. Бир ай бою жакшы ниеттер ишке ашырылып, соопчулук иштер жасалды. Орозо айында береке жаап, муктаждарга садага берилип, таза тилек менен жасалган иштер арбын болду. Жан дүйнөбүз арууланып, ак ниетибиз менен адал иштерди аткарып, бири-бирибизге жакшылык тартуулаганга умтулдук.

Кармаган орозоңуздарды Жараткан кабыл кылсын! Бул айда жасаган жакшы иштерибиз коомубуздун ынтымагын бекемдесин. Кыргыз жергесине дайыма ушул Орозо айындагыдай кут төгүлүп, ар бир үйдө бак-таалай, ырыс-береке толуп турсун. Ар дайым мекенибиздин асманы ачык, элибизде ынтымак, биримдик жана молчулук болсун. Кыргыз мамлекетибиздин күн сайын алдыга карай өнүгүүсүнө ар бирибиз салым кошолу! Орозо айтыңыздар маарек болсун!" деп жазылат куттуктоодо.