Баткенде 10 жаштагы бала атасынын жашырып койгон куралын таап алып, чогуу ойногон досуна ок чыгарды

Баткен облусуна караштуу Кадамжай районунун Көтөрмө айыл аймагында 10 жашар бала 9 жаштагы баланы кокустан атып алды. Бул тууралуу Баткен ОИИБинин басма сөз кызматы билдирди.

Маалыматка ылайык, Кадамжай районунун Көтөрмө айыл аймагындагы Кара-Шоро айылынын 43 жаштагы тургуну М.Ж. турак үйүнүн жанында жайгашкан мал сарайынын ичине ТОЗ-8 үлгүсүндөгү ок атуучу куралын жашырып койгон. Мындан улам үй эсинин 10 жаштагы уулу Э.А. куралды таап алып, айылга жайкы эс алууга келип чогуу ойноп жаткан 9 жаштагы Н.А. атуу өспүрүмгө кокусунан ок чыгарып алган. Натыйжада Н.А. бетинин оң жагынан жаракат алып, ата-энеси тарабынан Кадамжай райондук ооруканасына жеткирилген. Анын бетинин оң жагынан 5,6мм калибриндеги ок алынган. Кадамжай РИИБинин кызматкерлери окуя болгон жерге барып, 43 жаштагы М.Ж.га таандык болгон ТОЗ-8 үлгүсүндөгү ок атуучу курал эч кандай мыйзамдуу документи жок сакталганы жана каттоодо турбагандыгын аныкташкан. Учурда бул факты боюнча тиешелүү экспертизалар дайындалып, текшерүү иштери жүрүп жатканы айтылат маалыматта.