Эркектерди кыз ала качууга түрткөн 3 себеп. Акыйкатчынын версиясы

Кыргыз өлкөсүндө жылына 45-50 миң үй-бүлө курулат. Бул тууралуу парламенттин тармактык комитетинин жыйынында акыйкатчы Кубат Оторбаев айтты.

Анын айтымында, жылына курулган үй-бүлөлөрдүн 20 пайызы ала качуу жолу менен түптөлөт.

"Ала качууга эркек тарабынан негизги 3 нерсе себеп болот. Алар: калың төлөөдөн качуу, кыздар менен таанышуудан тартынуу, кыздын ата-энесинин каршы болушу. Мындан башка да себептер бар. Ала качуу менен курулган 20 пайыз үй-бүлөлөрдүн 6 пайызы зордуктоо менен коштолгон. Кыз ала качуу окуялары шаарга салыштырмалуу айылдарда 2 эсе көп болот", - деди Оторбаев.

Учурда Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитетинде акыйкатчы Кубат Оторбаев 2016-жылдагы адам укугунун абалы тууралуу баяндама жасоодо.