Бүгүн Колумбия-Япония, Польша-Сенегал жана Орусия-Египет беттештери орун алат

Бүгүн, 19-июнда Орусияда өтүп жаткан футбол боюнча Дүйнө биринчилигинин тайпалык оюндарынын биринчи айлампасынын алкагында "Н" тайпасындагы Польша, Сенегал, Колумбия жана Япония курамалары алгачкы оюндарын өткөрөт. Ал эми "А" тобундагы Орусия менен Египет тайпалык баскычтагы экинчи беттешин өткөрөт.

Колумбия жана Япония курамаларынын оюну Саранск шаарында орун алган 45 миң орундуу "Мордовия Арена" стадионунда Бишкек убактысы менен саат 18:00дө орун алат. Беттешти словениялык калыс Дамир Скомина тейлейт. Буга чейин Япония Колумбияны бир да жолу жеңе алган эмес. Эки команда тарыхында үч жолу кез келип Колумбия эки жолу жеңишке жетсе, бир жолу тең чыгышкан.

Польша жана Сенегал оюну Москва шаарында жайгашкан "Спартак" стадионунда Бишкек убактысы менен саат 21:00дө башталат. Аталган эки команда буга чейин беттешкен эмес, мындан улам кайсыл команда жеңишке жетсе команданын жеке тарыхына жеңүүчү деп жазылып калат. Ал эми беттешти бахрейндик калыс Наваф Шукралла тейлейт.

Бул күндүн негизги беттеши делген Орусия менен Египеттин оюну саат 00:00дө Санкт-Петербург шаарында орун алган "Санкт-Петербург" стадионунда өтөт. Ал эми беттешке башкы калыс болуп парагвайлык Энрике Касерес дайындалган. Эки курама тарыхында алгачкы ирет кез келип жатышат. Ошондой эле бул беттеште Египеттин чабуулчусу Мохаммед Салах оюнга чыгууга даяр экенин видео кайрылуу жасап айткан. Буга чейинки оюнда Орусия Сауд Арабияны 5:0 эсебинде жеңсе, Египет Уругвайдан 1:0 эсебинде жеңилүү ызасын тарткан.