Темир Сариев УКМКга суракка кирип кетти

Бүгүн, 19-июнда мурдагы премьер-министр Темир Сариев Улуттук коопсуздук боюнча мамлекеттик комитетине суракка кирди. Ал ЖЭБди модернизациялоого байланыштуу коррупция фактысы боюнча күбө катары чакырылганы белгилүү.

Сариев УКМКга кирип бара жатып "өткөндө бардык суроолоруна жооп бергем, бүгүн эмне үчүн чакырганы суракта билинет" деп журналисттерге билдирди.

Буга чейин ал 13-июнда биринчи жолу сурак берип чыккан эле. Анда да Сариев ЖЭБди модернизациялоого байланыштуу коррупция фактысы боюнча күбө катары чакырылган. Сурак берүү убактысы болжол менен 2 саатка созулган.

Белгилей кетсек, 26-январда Бишкек ЖЭБинде өндүрүштүк кырсык болуп, шаардагы үйлөргө берилген жылуулук 7 күнгө төмөндөгөн. Мындан улам бир жыл мурун Кытайдан алынган 386 миллион доллар менен жаңыланган ЖЭБге карата сын-пикирлер күчөгөн. Бул факты боюнча кылмыш иштери козголуп, тергөөнүн жүрүшүндө бир топ жооптуу кызматкерлер кармалган.