Ала-Букада коңшусунун үйүнө сабак даярдайм деп кеткен кызды зордуктаганга шектүү жигит - экинчи топтогу майып

Жалал-Абад облусунун Ала-Бука районунда окуучу кызды зордуктаган жигит - экинчи топтогу майып. Бул тууралуу Жалал-Абад ОИИБинин басма сөз кызматкери SUPER.KG порталына билдирди.

"17 жаштагы окуучу кызды зордуктоого шектелген жигит 2-топтогу майып экени анык. Кылмышка шектүү Ала-Бука РИИБинин убактылуу кармоочу жайына киргизилип, 2 айга камакка алынган. Учурда тергөө иштери улантылып жатат. Азырынча ал күнөөсүн моюнуна алды деп айтууга али эрте", - дейт маалымат катчы.

Эске салсак, 15-июнь күнү Ала-Бука РИИБине 17 жаштагы кыздын атасы арыз менен кайрылган. Арызда 11-класстын окуучусу кошунасынын үйүнө барып сабакка даярданам деп кетип, дайынсыз жоголуп кеткен. Ыкчам иликтөө иштеринин натыйжасында дайынсыз жоголгон өспүрүм кыз 14-июндан 15-июнга караган түнү күч колдонуп зордукталганы аныкталган. Ал эми кылмышка шектүү катары Ала-Бука районунун Сары-Талаа айылынын 1993-жылы туулган А.Э. аттуу тургуну кармалган.