Инстаграм социалдык тармагында эми мөөнөтү узак видеолорду жүктөө мүмкүнчүлүгү пайда болду

Инстаграм социалдык тармагында эми мөөнөтү узак видеолорду жүктөө мүмкүнчүлүгү пайда болду. Бул тууралуу чет элдик маалымат каражаттары жазып чыгышты.

Маалыматка ылайык, Сан-Францискодогу Инстаграм социалдык тармагынын жаратуучулары IGTV тиркемеси ишке кире тургандыгын маалымдашкан. Бул тиркеменин жардамы менен узактыгы 1 саатка созулган видеолорду жүктөөгө жана көрүүгө мүмкүн болот.

Компаниянын билдиргенине таянсак, колдонуучулар алар жазылган адамдын видеолорун издеп убара болушпайт.

"Телевизорду күйгүзгөндөй эле, тиркеме тармакка кирген учурда автоматтык түрдө видеолорду көргөзө баштайт", - дейт жаратуучулар.

Колдонуучу "Сиз үчүн", "Сиз жазылган", "Популярдуу", "Көрүүгө сунушталган" аттуу каналдарды которуп видеолорду көрө алат. Көрүү учурунда билдирүү жазып же башка колдонуучуга видеону жөнөтө алат. Бардык колдонуучулар өз каналын түзө алышат.

Аталган тиркеме Android жана iOS`тун колдонуучулары үчүн жеткиликтүү. Белгилей кетчү нерсе Инстаграм социалдык тармагынын колдонуучуларынын саны 1 миллиардга жетти.

"Тармак 2010-жылы ишке киргенден баштап популярдуулукка жетти. Мүнөт сайын колдонуучулардын саны өсүп жатат. Биз 1 миллиардга жеттик. Биз үчүн бул чек эмес. Баарыңыздарга рахмат", - деп билдирген жаратуучулар.