Текебаевдин иши каралган соттук отурумга катышкан мамлекеттик жактоочуга сөгүш жарыяланды

"Өмүрбек Текебаевдин иши шаардык сотто каралып жатканда анын жактоочусу болуп мамлекеттик жактоочу Элмира Чоноева кирген. Бирок анын аркети Адвокатуранын этика боюнча комиссиясы тарабынан мыйзамсыз деп табылып, ага сөгүш жарыяланды", - деп маалымдады бүгүн, 21-июнда Текебаевдин жактоочуларынын бири Таалайкүл Токтакунова.

Анын айтымында, комиссия өкүлдөрү Чоноеваны каралып жаткан иштин материалдары, аппеляциялык арыз менен таанышкан эмес деп таап, айыпталуучунун өзүнүн макулдугусуз аны отурумда жактоо укугунан ажыратышты.

"Мындан тышкары соттун өзүнүн Чоноеваны мамлекеттик жактоочу катары чакыруу боюнча токтому жок. Өмүрбек Текебаевдин өзүнүн жактоочулары бар да. Бул деген экинчи инстанциянын чечими мыйзамсыз дегенди билдирет", - деди Токтакунова.

Ошондой эле ал Адвокатуранын этика боюнча комиссиясынын чечими буга чейин Текебаевдин юристтери Башкы прокуратуранын анын ишин кайрадан кароодон баш тартуусу боюнча сотко жазган арызына кошула тургандыгын кошумчалады.