Аргентиналык күйөрмандар курама команданын башкы машыктыруучусун бөтөлкө менен чаап жиберишти

Аргентиналык күйөрмандар курама команданын башкы машыктыруучусун бөтөлкө менен чабышты. Бул тууралуу орусиялык басылмалар жазып чыгышты.

Маалыматка ылайык, 22-июнга караган түнү орун алган Хорватия-Аргентина беттешинде аргентиналык күйөрмандар команданын башкы машыктыруучусун желим бөтөлкө менен чаап жиберишкен. Хорватия курама командасы өзүнүн 3 голун киргизген учурда аргентиналык күйөрмандар тарабынан Хорке Сампаоли тарапка ичинде суусу бар желим бөтөлкө ыргытылган.

Оюндан соң орун алган маалымат жыйынында Сампаоли жоопкерчиликти өз моюнуна аларын, бирок футболчулар өзүн толук түрдө оюнда ачып бере албагандыктарын билдирген.

"Мен Кабальерону дарбазага койгом, демек, бул жеңилүү үчүн жоопкерчиликти өз моюнума алам. Башка тактика ойлоп тапканымда оюн башкача жүрмөк. Эмне себептен Мессинин оюну жүрүшпөй жатат? Ал жалпы курама команданын жетишсиздигинен жабыр тартууда", - деген машыктыруучу.

Ошондой эле Дүйнө чемпиондугунда калуу үчүн команда болгон күчүн жумшай тургандыгын билдирип өткөн.