Премьер-министр коррупциялык иштерден өндүрүлгөн каражаттар үчүн атайын эсеп ачуу боюнча токтомго кол койду

Премьер-министр Мухаммедкалый Абылгазиев коррупциялык иштерден өндүрүлгөн каражаттар үчүн атайын эсеп ачуу боюнча токтомго кол койду. Бул тууралуу бүгүн, 22-июнда өкмөттүн басма сөз кызматы билдирди.

Токтомго ылайык, бул эсепке экономикалык жана кызмат адамдарына козголгон кылмыш иштеринин алкагында алынган каражаттар топтолот. Анда мамлекетке келтирилген чыгымдар кайтарылып, өзүнчө эсепте сакталып, өкмөттүн чечими менен бөлүштүрүлөт. Бул эсеп жүргүзүүнүн натыйжалуулугун арттырып, коомдун жана мамлекеттин муктаждыктарын эске алуу менен каражатты майнаптуу колдонууну камсыздайт.

Эске салсак, Абылгазиев 14-июнда парламентте отчёт берип жатып тышкы карыздан кутулуу үчүн коррупциялык иштерден өндүрүлгөн жана мамлекетке жардам берүүнү каалагандар үчүн атайын эсеп ачыла турганын билдирген.