Коопсуздук кеңеши: "УКМКны көзөмөлдөөчү жаңы комитет түзүү шарт эмес"

УКМКны көзөмөлдөөчү жаңы комитет түзүү шарт эмес. Мындай пикирин бүгүн, 22-июнда Коопсуздук кеңешинин өкүлү Жогорку Кеңештин көзөмөлдөөчү кызматына арналган тегерек столдо айтты.

Тегерек столдун катышуучулары депутаттар тарабынан сунушталган демилгени талкуулашууда. Аталган демилгеге ылайык, Жогорку Кеңеште УКМКнын ишин көзөмөлдөөчү комитет түзүү сунушталып жатат.

Депутат Наталья Никитенко Жогорку Кеңеште аталган багытта 2 комитет болгону менен УКМКны көзөмөлдөөчү өзүнчө комитет керек деген пикирде. "Жогорку Кеңеште мурда ондон ашык комитет бар эле. Аны кыскартып 9га түшүрдүк. Бирок биз демилгелеген комитет учурда керек", - деди ал.

Депутат Исхак Масалиев аталган комитет түзүлсө Жогорку Кеңештин таасири күчөп, парламентаризмдин өнүгүшүнө салым кошорун айтты.

Аталган демилге боюнча Коопсуздук кеңешинин өкүлү да өз пикирин билдирди. "Демилгечилер өлкөдөгү коопсуздук тармагын, ошонун ичинде Улуттук коопсуздук мамлекеттик комитетин көзөмөлдөөчү жаңы комитет түзүүнү сунушташууда. Аталган милдетти Жогорку Кеңештин Эл аралык иштер, коргоо жана коопсуздук комитетине ыйгаруу туура. Жаңы комитет түзүү учурда максатуу эмес деп ойлойбуз", - деди Коопсуздук кеңешинин өкүлү.