Түштүк Корея менен Түндүк Корея эки өлкөдө жашап калган туугандарды жолуктуруу тууралуу макулдашышты

Түштүк Корея менен Түндүк Корея эки өлкөдө жашап калган туугандарды жолуктуруу тууралуу макулдашышты. Бул тууралуу чет элдик маалымат булактары жазууда.

Маалыматка караганда, туугандардын жолугушуусу 20-26-августтарга болжолдонууда. Жолугушууга эки тараптан тең жүздөн үй-бүлө катталат. Мындан сырткары эки тарап жолугуша турган үй-бүлөлөрдүн туугандарын издөөнү 3-июлга чейин жүргүзөт. 4-августка чейин жолугушууга келе турган адамдардын аты-жөнүн тактоо иштери аяктайт.

Акыркы жолу мындай иш-чара 2015-жылы өткөрүлгөн. Андан кийин эки тараптын мамилесинин начарлашына байланыштуу токтоп калган. 27-апрелде Корея элдик демократиялык республикасынын лидери Ким Чен Ын менен Түштүк Кореянын президенти Мун Чжэ Ин эки өлкөнүн чек арасында жолугушуу өткөрүшкөн. Анда 1950-53-жылдардагы согушта бөлүнүп калган үй-бүлөлөрдү бириктирүү тууралуу кеп козголгон.