Сузакта тыюу салынганына карабай атайын унаа жалдап бүтүрүү кечесин өткөрүп жүргөн окуучулар кармалды

Сузакта атайын унаа жалдап бүтүрүү кечесин өткөрүп жургөн окуучулар кармалды. Бул тууралуу Жалал-Абад облустук Жол коопсуздугун көзөмөлдөө бөлүмүнүн маалымат катчысы SUPER.KG порталына билдирди.

Маалыматка ылайык, бүгүн, 23-июнда Жалал-Абад облустук Жол коопсуздугун көзөмөлдөө бөлүмү мектеп бүтүрүүчүлөрүнүн тартип бузуусун алдын алуу максатында рейд өткөрүүдө.

"Жол коопсуздугун көзөмөлдөө бөлүмүнүн кызматкерлери облустун бардык аймактарындагы бүтүрүү кечелеринде ата-энелер, мугалимдер жана ошондой эле бүтүрүүчүлөр менен жер жеринде жолугуп түшүндүрүү иштерин жүргүзүшкөн. Аталган иш-чаранын максаты жол кырсыктарынын алдын алуу максатында өтүүдө. Учурда ыкчам чара көрүү отрядынын кызматкелери менен биргеликте атайын блок постор коюлуп, андан сырткары айланып журүүчү мобилдик топтор түзүлүп иш алып барышууда", - деди маалымат катчы.

Бирок буга карабастан Сузак районунун Кызыл-Туу айыл өкмөтүндөгү А.Базаров атындагы орто мектебинин 11-классынын бүтүрүүчүлөрү атайын тойго чыгуучу эки автоунааны жалдап "Кара Алма" аттуу эс алуу жайына бара жаткан жеринен кармалганын маалымат катчы билдирди.

"Окуучулар Сафаровка айылынан кармалышты. Учурда райондук билим берүү өкүлдөрү, мектеп жетекчилери, ошондой эле ата энелер чакыртылды", - дейт маалымат катчы.

Эскерте кетсек, быйыл Билим берүү жана илим министрлиги бүтүрүү кечелерине, мектеп жетекчилерине акча чогултуп, бүтүрүүчүлөр жана алардын ата-энелери менен бирге кафе, ресторанга барууга, унааларды жалдап жаратылышка чыгууга тыюу салган.