Орусияда дүкөндө иштеген Кыргыз жараны болгон келин өрттөн каза болду. Анын өлүмүнө күйөөсү шектелүүдө

Орусиянын Киров районундагы Шлиссельбург шаарында кыргыз келин өрттөнүп каза болуп, анын кайниси өрттөн жабыркады. Бул тууралуу Орусиянын 47news.ru. басылмасы жазып чыкты.

Маалыматка караганда, окуя 23-июндан 24-июнга караган түнү жергиликтүү депутаттар кеңешин шайлоо алдында болгон.

"Алар кирип келип эле бизге бензин куюп, андан кийин өрттөп жиберишти" деп кырсыктан оор жаракат алган Кыргыз жигити дарыгерлерге айткан. Бул кылмышка өрттөнүп каза болгон кыргыз келиндин күйөөсү шектелип жаткандыгы маалыматта жазылат.

24-июнга караган түнү саат 2:30дар чамасында аталган шаардагы өрттөнгөн павильондордун биринен сатуучунун жансыз денеси табылган. Ошол эле жерде өрттөн катуу жаракат алган адам ооруканага жеткирилген. Жабыркаган 19 жаштагы Кыргыз жараны дарыгерлерге аларга өрт койгондор эшикти сыртынан бекитип кетишкенин айткан.

Өрт тууралуу ӨКМга саат 02:19да билдирүү келип түшүп, саат 2:51де ал толугу менен өчүрүлгөн. Кырсык тууралуу кабарды өрт өчүрүүчүлөргө жергиликтүү тургун кабарлап, биринчи катуу үн чыгып, андан кийин кара түтүн каптап кеткенин айткан.

Дүкөндүн ээси Кристина Прибыткованын айтымында, каза болгон кыздын аты Гүлнара. Ал каза болгондон кийин үйүнөн паспортун табышканда 1981-жылы туулгандыгы көрсөтүлгөн. Ал Кыргыз жеринен Орусияга келип бул дүкөндө сыноо мөөнөтүндө бир айга жетпеген убакыттан бери иштеп жүргөн. Прибыткова ага түн жарымда телефон чалышып, дүкөн жабык турганын, ичиндеги текчелер сынып жатканын жана кан болуп жатканын айтышканын билдирген.

"Саат бирде мен Гуляга (Гүлнарага) чалгам, ошондо ал мага "күйөөм павильонго мас абалында келип сабады, дүкөндүн ичиндеги текчелердин баарын талкалады", - деп айткан. Гүлнара ыйлап, аябай туталанып алган экен, эмне себептен сабаганын кийин айтып берем деген болчу", - деген Прибыткова.

Иликтөөнүн жүрүшүндө Гүлнара күйөөсү дүкөндү талкалап, өзүн сабап кеткенден кийин Кировскка кеткен. Андан кийин күйөөсүнүн иниси менен келип, павильондун ичин иретке келтире башташкан. Бул учурда Гүлнара менен нөөмөт алмашкан Наталья аттуу аял да келип, дүкөндүн ичин тазалоого жардамдашып, жумуш бүткөн соң үйүнө кеткен.

"Наталья кетип бара жатып Гуляны "биздин үйгө жатып кал" деп өзүнүн үйүнө чакырган экен. Бирок Гуля макул болбогондуктан мейманканада жат деп чечишкен. Ошондо Наталья Гулядан күйөөсүнүн номерин сурап, анын бул жоругу тууралуу сүйлөшөйүн деген. Гуля күйөөсүнө чалганды туура көрбөй, ал мас болуп уктап жатса керек деп жооп берген. Ал эми түнкү саат 3тө мага дүкөндүн өрттөнгөндүгү тууралуу кабар келди, бирок терезелерде темир тосмолор жок болчу", - деген дүкөндүн кожоюну Прибыткова.

Ал эми тергөө комитети Гүлнара өлүмүнөн мурун павильондун ээсине айтып берген даректен анын күйөөсүн кармашканын билдиришкен. Полиция айтылган дарекке барганда күйөөсү дагы деле мас абалда болгон. Күйөөсүнүн билдиргенине караганда, ал кызганычтан улам аялын бир нече жолу уруп жүргөн. Бирок өрттөп жиберүүгө эч кандай тиешеси жок экенин өзүнүн арызында жазып бергени менен, тергөөчүлөр буга күмөн санашууда. Маалыматта белгиленгендей, азырынча тергөө амалдары бул кылмышка түртө турган башка шектүү азырынча жок экенин көрсөтүүдө.

Ал эми кыздын темир тосмосу жок терезелерди сындырып сыртка качып чыга албай калгандыгын полиция ага бат өрттөнүп кетчү суюктук куюлгандыгы менен байланыштырууда. Андай суюктук дүкөндүн ичине да куюлушу мүмкүн, дароо жалындап кеткенде кыз катуу корккондон нес абалда болуп, айнектен чыгуу эсине келген эмес деген божомолдор айтылууда.

SUPER.KG порталы бул боюнча маалымат алуу үчүн Кыргыздын Орусиядагы элчилигине байланышуу аракетин көрүүдө.