"ЭЛДИК КАБАРга" жооп: Айыл өкмөт башчысы: "Тоңдун Тогуз-Булак айылында таза суу көйгөйү жок"

Буга чейин SUPER.KG порталынын “Элдик кабар” бөлүмүнө окурман: “Ысык-Көл облусундагы Тоң районунун Тогуз-Булак айылында ичүүчү суу маселеси төрт жылдан бери чечилбей жатат", - деп кабарлаган. Ошондой эле окурман айылга ичүүчү сууну киргизүүгө өкмөттөн 11 миллион сом бөлүнгөнүн кошумчалаган.

Бул маселе боюнча Көл-Төр айыл өкмөтүнүн башчысы Кубаныч Алиевге кайрылганыбызда төмөндөгүлөрдү билдирди: “2014-жылдагы жер титирөөдөн кийин таза суу системи толугу менен жаңыланып, 2 жолу атайын комиссиянын текшерүүсүнөн канааттандырарлык деген баа алган. Тогуз-Булак айылында учурда таза суу көйгөйү жок. Суу эч кандай үзгүлтүккө учурабай берилип жатат.

Быйыл кышта катуу сууктан улам суу тазалоочу аппарат иштен чыгып, ал оңдолгуча эл таптакыр суусуз калбасын деп фильтрсиз сууну коё берүүгө аргасыз болгонбуз. Ошондо айрымдары сүрөткө тартып алышкан экен, ошону азыркы көйгөй катары жөнөтүп жатышат. Ал эми көчөлөрдөгү суу чыкчу колонкаларды атайын алмаштырган эмеспиз. Анткени келечекте сууну ар бир үйгө алып кирүү планыбыз бар.

Айылда айыл өкмөттүн ишине атаандаштык кылып жүргөндөр бар, мен ошолордун аракети деп түшүндүм”.