Орусияда өспүрүмдөр кызыктуу видео тартабыз деп үй-жайы жок адамды өрттөп салышты

Орусиянын Тольятти шаарында өспүрүм курактагы балдар кызыктуу видео тартабыз деп үй-жайы жок, көчөдө уктап жаткан адамды өрттөп жиберишти. Бул тууралуу орусиялык басылмалар жазышууда.

Маалыматта жазылгандай, окуя 24-июнда кечке жуук болуп өткөн. Шаар ичинде ойноп жүргөн өспүрүмдөр көчөдө уктап жаткан адамдын үстүнө күйүүчү суюктук чачып, өрт коюп жиберишкен да, аны видеого тартып турушкан.

"Жолдон өткөн адамдар өрттү өчүрүүгө киришип, "Тез жардам" кызматын чакырдык. Ошол учурда да өспүрүмдөрдүн бири телефонго тартканын токтоткон жок", - деп окуянын күбөсү орусиялык басылмаларга айтып берген.

Жабырлануучунун денесинин 50-70 пайызы күйүк алып, учурда абалы оор экендиги, ал эми укук коргоо органдары бул тууралуу териштирүү иштерин жүргүзүп жатканы жазылат маалыматта.