Депутат Рысалиев ИИМдин өкүлүнөн "уюшкан кылмыштуу топторду качан талкалайсыз" деп сурады

Бүгүн, 26-июнда Жогорку Кеңештин тармактык комитетинин жыйынында “Республика-Ата Журт” фракциясынан депутат Зарылбек Рысалиев Ички иштер министрлигинин Криминалдык милиция кызматынын башчысынын орун басары Мыктыбек Болушевден канча уюшкан кылмыштуу топ бар экенин сурады.

Болушевдин айтымында, 3 уюшкан кылмыштуу топ бар.

Зарылбек Рысалиев: “Уюшкан кылмыштуу топ менен кантип күрөшүп жатасыңар? Эркекче айтыңызчы, качан талкалайсыңар? Ички иштер министри Кашкар Жунушалиев 3 айдан бери күрөшүп бүтө албай жатат. Сиз так мөөнөтүн айтышыңыз керек”, – деди.

Болушев күрөшүү иштери жүрүп жатканын айтты. "2 ай ичинде 18 уюшкан кылмыштуу топтун мүчөсү кармалды. Иш жүрүп жатат. Так мөөнөттү айта албайбыз” - деди Болушев.

Рысалиев бир ишти бүтүрүү үчүн жоопкерчиликтүү адам жана так мөөнөт болуш керек деген пикирин айтты.