Белгисиз адамдар уурдап кетти деген бала каналдагы сууга агып кетип каза болду

Ош шаарында агасы менен ойногону кетип, каналдагы сууга агып кеткен 7 жаштагы бала каза болду. Бул тууралуу Ош ШИИБинин маалымат кызматы билдирди.

Маалыматка ылайык, окуя кечээ, 28-июнда саат 13:00дөрдө катталган.

"Каналга агып кеткен бала 9 жаштагы агасы менен ойноо үчүн үйүнөн чыгып кеткен. Алар канал жээктеп ойноп жатып 7 жаштагы бала сууга агып кеткен. Агасы ата-энесине инисин белгисиз сакалчан адамдар унаага салып кеткен деп калп айткан. Бизге ыкчам маалымат келери менен тинтүү иштерин баштаганбыз. Арадан 3-4 саат өткөндөн кийин баланын каналдагы сууга агып кеткени маалым болгон. Издөө иштеринин натыйжасында бүгүн, 29-июнда эртең мененки саат 8:40 чамасында баланын денеси Кара-Суу районунун Шарк айылындагы чоң каналдын бөлүнгөн жеринен табылган", - деп билдирди маалымат кызматы.

Белгилей кетсек, балдардын ата-энеси аларга "сууга түшпөгүлө, каналдын жээгине ойнобогула" деп эскертүү берген. Бирок кырсык болгондон кийин агасы ата-энем урушат деп инисинин сууга агып кеткенин жашырып, аны белгисиз адамдар алып кетти деп калп айткан.